1Th 1 | PMA | STEP | Inau, Pol, ral min Saelas ka Timoti, metmutis leta ekek va ven kami, meatin keil koa avi onen Ahi Tata ka Asuv Iesu Kristo koa mimul en sios ten out Tesalonaeka. Metvisi keke more envatien ka tomat onen Ahi hel en moulien onami.

1 Thessalonians 1

1 Inau, Pol, ral min Saelas ^{▼▼1:1 Saelas, isen tamun vi Silvanus.} ka Timoti, metmutis leta ekek va ven kami, meatin keil koa avi onen Ahi Tata ka Asuv Iesu Kristo koa mimul en sios ten out Tesalonaeka. Metvisi keke more envatien ka tomat onen Ahi hel en moulien onami.

Pol Masmas Ahi ven More Moulien ka Demkatien onen Kristin Keil en out Tesalonaeka

2 Lises metmasmas Ahi ven kami vasi ka lises metling kami en hisien onomeitel. 3 Navong metvis min Ahi Tamer en usite onami, metmundem kat tounah keitel ekek: mukave demkatien onami mul sakin kami mimum keih, mukave envatien onami mul sakin kami mikataun meatin sav keil, ka mukave desien onami en amairisien onen Asuv Iesu Kristo mul sakin kami mimulomal keih navong sakvisien keil mul mai. 4 Tuameitel ka ahinameitel keil, metkilea keke Ahi envat kami ka rie lat kami tuai mivahi onen. 5 Metkilea keke Ahi rie lat kami veni navong metkur more longlongien va ven kami, romaiteis en selusien enges. Vuo, mai mun ral min keihoen onen Ninin Votut ka mikilea revi anatinien teni navong metselus min kami. Kami milei kilea sakien ten moulien onomeitel navong metro ral min kami keke metvakataun kami. 6 Ka kami milisungein sakien keil onomeitel ka sakien keil onen Asuv Iesu keke navong mahien mai en kami ven demkatien onami, mikur selusien onen Ahi ral min sien koa Ninin Votut sani min kami. 7 En sakien koanek, kami mimai mivi metai min kristin vasi keil koa amul en provins keilu ten out Masedonia ka Akea keke akilea avalisungein sakien onami. 8 Kami mivitehiten selusien usil Asuv Iesu min meatin sav keil koa akuri uva rokol meatin keil en provins keilu ekek, ka muli va en out savsav keil emun. Anatin, longlongien usil demkatien onami musel suval amaru keke meatin sav keil koa aro soutin amul araengoni. Sakini, tounah tovuol keke komeitel metvahiteni mun usil demkatien onami veni meatin keil akilea tuai eni. 9 Anatin, meatin vasi keil koa aro soutin ran kami en out keil ekek amul aselus usil mukave kami mikur revi komeitel navong metsao en kami. Avit usil mukave miviles ran nana keil keke miva netan min Ahi, kei koa moul ka vi anatin. 10 Keil avit usil mukave mimul mirosin Natnali vaka en out nesa koa Ahi rali lati ran matien. Anatin, avit usil mukave mirosin Iesu koa heting koe ir ran mahien koa hemai ven vurohien onen Ahi va kat tisaen keil.